Kanye West betohet, kurrë më në MTV

Humbësi më i madh i MTV Video Awards, Kanye West, të cilit i kanë dalë nga dora madje pesë statujat potenciale, është përbetuar se kurrë më nuk do të shfaqet në ndarjen e këtyre çmimeve.
Kanye West, i cili ka mbetur pa asnjë çmim, përkundër nominimeve në pesë kategori, nuk e ka pranuar lehtë humbjen.
"Ky është viti i dytë me radhë, njerëz. Jepini shansin njeriut me ngjyrë. Me të vërtetë po mundohem, njerëz. E kam pas albumin numër një, njerëz", thuhet të jetë shprehur Kanye, pas përfundimit të ndarjes së çmimeve nga MTV Video Awards, transmeton BBC.
Shkaku i kësaj humbje West ka thënë se kurrë më nuk do të kthehet në çmimet që ndahen nga televizioni muzikor MTV.
Hip-hoperi e ka provuar edhe më parë humbjen në ndarjen e çmimeve evropiane të MTV-së, vitin e kaluar. Ai kishte humbur në tetë kategori, në mes tjerash, edhe atë për videoklipin më të mirë të vitit. Në momentin kur çmimi iu kishte dorëzuar dyshes, Justice vs Simian, West ishte ngjitur në skenë dhe kishte deklaruar: "Videoja ime ka kushtuar një milion dollarë. Ejjj, Pamela Anderson është në të".